* masnawi........ SHAAHKAAR........(qist soyem) *
masnawi........ SHAAHKAAR........(qist soyem)
.................by RASOOL SAQI
Musawwir ki nazar pagdandion par door ja thahri
Nazar ke raastay wadi-e-dil mein roshni phaili
Woh rashk-e-aftaab-o- ghairat-e-gul jalwa saman tha
Ke jis kay pairahan se qasr-e-gul shola badaman tha
Khadi thi woh khameedah shakh ik pakde huye aise
ke baar-e-husn se shakh-e-gul -o- lala jhuke jaise
Rukh-e-taaban pa toofan-e-shabab uske machalta tha
Chiragh -e- lala -o- gul jiski taabani se jalta tha
Woh rukhsaar-e-shafaq zeba damak jiski sharaar asaa
Woh chashm-e-neem wa aisi bahek jiski khumar asaa
Woh dariya-e-tabussum ka tilism afza haseen sahil
Ke jis par doobna chaahen safeeraan-e-safeen-e-dil
labon ke darmiyan yun gohar-e-dandan chamakte tha
Ke jaise chashm-e-gul mein timtimate shabnami taare
Jab uski zulf ki kafir latein rukh par bikharti theen
To usko dekh kar kali ghatayen aahein bharti theen
Helali tha kaman abroo to khar-e-mizgaan nawuk tha
sarapa jiska shayer ke khayalon se bhi naazuk tha
Qalam kari pa qudrat ki musawir mahv-e-hairat tha
Nazar ke samney jalwa numa shahkaar-e-fitrath tha
....................................(continue ....qist chaharum) — |