* masnavi......SHAHKAAR......(qist panjum)) *
masnavi......SHAHKAAR......(qist panjum))
...................RASOOL SAQI
Sada aayee ke ai fankaar ye teri inayat hai
tera shahkaar gar mujh mein hai to ye meri qismat hai
ke tujhko malika e takhleeq e shahkaaran wadiyat hai
tera fan aaina hai aur tu akkas e fitrat hai
sadaqat ki zaya se surkhroo hai moo-qalam tera
ke tera canvas hai loh e yazdani ka razmeeyah
ke tera dil ghame jaanan gham e dauran ka maskan hai
ke teri rooh aazurdah dilon ka chaak e daman hai
teri takheel mein fankaar ki raff-at ka manzar hai
teri takhleeq mein footpath ki wus-at ka manzar hai
teri tahreer mein mashq e sitam galiyon ka maatam hai
teri tasweer mein ismat zadah kaliyon ka maatam hai
tere afkaar meindard e dil e muflis ka partaw hai
teri guftar mein karb e dil e mazdoor ki law hai
sati partha ki seene mein tere juwala dahekti hai
teri aaghosh mein aatish zadah dulhan sisakti hai
tere ashkon mein pinhaan hai tabahi laala zaron ki
teri aahon mein shamil hain nawayen sheer-khawaron ki
shikan teri jabeen ki daastan e qatl o gharat hai
tu khastah haal shahron ki shakista paa imarat hai
tera har paikar e tasweer faryadi ka aanchal hai
magar naqadri-ye aiyaam se dil tera bekal hai
ai afsurdah ,huzeen ,khalwat nasheen fankaar ijazat hai
basad shoq aa tujhe qirtas aarayee ki daawat hai
sitam khurdah dilon ki kaash main ghamkhwar ho jaaun
tere dast e mubarak se agar shahkaar ho jaaun
.................(continue....qist shashum )
|