حمد

رات دن تیری قدرت کے مظہر ہے تری شان اللہ اکبر
ہیں بہاروں میں تیرے ہی منظر ہے تری شان اللہ اکبر

تیرگی دور کرکے جہاں کی دینے آتا ہے سب کو گواہی
شب کے پہلو سے یہ دن نکل کر ہے تری شان اللہ اکبر

چاند ، سورج ، ستارے فلک پر کرتے رہتے ہیں دن رات سجدے
پتہ پتہ ہے تیرا ثناگر ہے تری شان اللہ اکبر

ذرّے ذرّے سے ارض و سما کے تیری وحدت کے جلوے عیاں ہیں
غنچہ غنچہ ہنسا پھول بن کر ہے تری شان اللہ اکبر

اے خدا تیری قدرت کے جلوے ساری دنیا میں بکھرے ہوئے ہیں
جلوہ گر ہے تو عرشِ بریں پر ہے تری شان اللہ اکبر

جھیل ، وادی ، چمن ، پھول ، شبنم تیری ہر شے پہ فرماں روائی
تو ہے سایہ فگن بحر و بر پر ہے تری شان اللہ اکبر

ریشما طلعت شبنم

Manzil-e-Subhan, Ist Main 3rd Cross
Shahanshah Nagar, Kolar-563101
Mob: 9620413772 / 9141499886
Email: talatshabnam786@gmail.com
بشکریہ ’’غزالانِ حرم‘‘ مرتب: مشتاق دربھنگوی
……………………………………