* hamesha saye ki maanind rehguzar meN raha *
hamesha saye ki maanind rehguzar meN raha
wo kaun tha? jo mire sath har safar meN raha
meN uske naqsh e qadam dhooNdta raha barsoN
jo mere sath shab o roz mere ghar meN raha
qadam qadam pe ujaloN ki rehnumai thi
wo roshni ki tarah meri rehguzar meN raha
samet leti he aksar kisi ki parchhai
mira wajood musalsal kisi asar meN raha
khud aaj apni hi nazroN se ho gaya ojhal
wo ek shakhs kabhi jo nazar nazar meN raha
sulagti dhoop meN kis ki panaah leN aakhir
darakht koi bhi "saalim" na rehguzar meN raha
--------------------------saalim shuja ansari |