غزل

نہ کھنکیں تو خاموشیاں بولتی ہیں
سمجھ بوجھ کر چوڑیاں بولتی ہیں

لہو کے قصیدوں سے رنگیں ہیں قصے
خبر کیا پڑھیں سرخیاں بولتی ہیں

محبت کی معراج ہے فاصلوں میں
بڑے پیار سے دوریاں بولتی ہیں

ہے کس کا دریچہ جہاں چاند اُترا
اگر چپ ہیں در کھڑکیاں بولتی ہیں

اُنہیں تو کسی سے محبت نہیں ہے
یہی جھوٹا سچ لڑکیاں بولتی ہیں

محبت تو خود کو چھپاتی ہے لیکن
محبت کی کمزوریاں بولتی ہیں

امیروں کی خوش کامیوں پر حجاب
غریبوں کی مجبوریاں بولتی ہیں

سلمیٰ حجاب

3/32, Vipul Khand
Gomti Nagar
Lucknow (U.P)
Mob: 9453077420
بہ شکریہ جانِ غزل مرتب مشتاق دربھنگوی
+++