غزل

حال میرا مہرباں تو یوں سرِ محفل نہ پوچھ
راز ہے یہ دوست کا کیوں ہوگیا غافل نہ پوچھ

زندگی بخشی ہے تونے یہ ترا احسان ہے
کیا دیا اِس زندگی نے کیا ہوا حاصل نہ پوچھ

روز و شب کی ڈائری تیرے یہاں محفوظ ہے
اب حسابِ زندگی اے مالکِ عادل نہ پوچھ

خون کی رنگت بتا دیتی ہے قاتل کا پتہ
ایک بسمل سے خدارا کوچۂ قاتل نہ پوچھ

اک ہوا کی بے رُخی نے کردیا قصہ تمام
ڈگمگائی جوں ہی کشتی حسرتِ ساحل نہ پوچھ

بھول کر بھی اک نظر اے شوخِ بے پروا اِدھر
اب نسیم خستہ سے تو اضطرابِ دل نہ پوچھ

سمیعہ نسیم

B/37, P.C.Colony
Kankar Bagh
Patna-800020
(Bihar)
Ph: 0612-2351537
بہ شکریہ جانِ غزل مرتب مشتاق دربھنگوی
+++