kabhi khayal me manzar jo eik rehta tha
Wahi jhuki hui shakhen wahi dareecha tha


usi ne phool khilaaye tamam khushyon ke
wo muskuraata hua jo tumhaara lehja tha

kisi ki aankhen kahani suna rahi thin mujhey
mohabbaton ka rawaN bezabaan dariya tha

tumhari aankheN samajhti thein dard mera bhi
tumharey dil se kabhi aisa eik rishta tha

mere labon ki zameeN par rawaN tha naam uska
kis ahtiyaat se wo mere dil mein basta tha

mujhey to roz hi milne ki us se khwahish thii
Magar wo 'seema' bahut door mujh se rehta tha
******************