غزل

ہر اک نگاہِ فکر و تجسس سفر میں ہے
کس شخص کی تلاش تری رہ گزر میں ہے
ہر شخص ہے حصار میں خوف و ہراس کے
اِس دور کا ہر آدمی کانٹوں کے گھر میں ہے
چاہوں اگر تو رکھ دوں خلا کو کھنگال کر
قوت وہ حوصلے کی مرے بال و پر میں ہے
کس طرح بچ سکوگے یہ تدبیر سوچ لو
جو آرہا ہے آگ کا دریا نظر میں ہے
جو کچھ ہوا ہے آخری وہ حادثہ نہیں
اک اور انقلاب ہماری نظر میں ہے
کم کس طرح ہے میری اطاعت کا وہ ثبوت
سجدوں کا جو نشان ترے سنگِ در میں ہے
اِس پر توجہ کی تو ضرورت ہے اے سراج
مشکوک کیوں وقار ترا ہر نظر میں ہے

محمد سراج انور مونگیری

Rameshwerpur Road, Garden reach
 Kolkata-700024
بشکریہ ’’میر بھی ہم بھی‘‘	مرتب: مشتاق دربھنگوی
………………………