غزل

اے ازلی الوجود اے ابدی البقا
بے ادبانہ نہ چل حلقہ عبدیت میں آ
خالق و مخلوق تو مالک و مملوک تو
ساجد و مسجود تو عُجب نہ کر سرجھکا
کعبۂ مقصودکاحج تیرے اوپرہے فرض
وسعتے دل ہے مناخون تمنابہا
جان صداقت پہ دے صدق ہے فطرت تری
زیست کی پروا نہ کر زیست ہے دام فنا
موردِ آفات رہ ظلم کا تابع نہ بن
بھول نہ بھلے سے بھی واقعہ کربلا
گلشن حق الیقیں سامنے آنکھوں کے ہے
چہرہ سے اپنے ہٹا پردہ بیم و رجا
روز ازل خود کہا جوش طرب میں الست
ہو گیا پھر کیوں خموش دے کے صدائے بلا
کلمہ قالوا کو تو صیغہ غائب نہ جان
جمع کو واحد سمجھ لفظ کا دھوکا نہ کھا
خاک کے پتلے سنبھل خاک کا پُتلا نہ بن
تیری تو مسند ہے عرش خاک کجا تو کجا
خار بھی اس باغ کا اپنی جگہ پھول ہے
شان سے تیری ہے دور خود کو سمجھنا ہوا
آنکھ سے اشکال دیکھ کان سے آواز سن
کہہ کے پشیماں نہ ہو مطلب چوں و چرا
فرش زمیں اے پسر ہے تری تعلیم گاہ
جملہ شئونات کے معنی و مطلب لگا
تاکہ ہو عین الیقیں پاک کثافت سے
پیس یہاں تک کہ دل پس کے بُنے سرمہ سا
زندگی دائمی کی جو تجھے ہے تلاش
ذات میں اپنی فنا ہو کے طلب کر بقا
شاد سخن کی ترے قدر کوئی کیا کرے
ایسے جواہر ہیں یہ خلد ہے جن کی بہا
٭٭٭