غزل

غفلت میں ہوئی اوقات بسر اے عمر گریزاں کچھ نہ کیا
تھی فکرِ وصال یار بہت لیکن سرو ساماں کچھ نہ کیا
واعظ نے خموں کو چور کیا ترکردی زمیں اے پیر مغاں
ظالم نے ذرا تیرا بھی لحاظ اے رہبر ایماں کچھ نہ کیا
میں پینے کا دل میں جوش نہ تھا ظاہر کی طلب تھی ہوش میں آ
ساقی نے ملایا زہر اگر اے منکر احساں کچھ نہ کیا
سنتا ہوں عدو کو خاک کیا مٹی میں ملا جسم اُس کا
پھونکا نہ جلا کر مجھ کو اگر اے شعلہ ہجراں کچھ نہ کیا
تربت پہ بلائے گاان کو یہ خام خیالی ہے دل کی
وہ گھر میں کرے گا کیا جاکر جس نے سر میداں کچھ نہ کیا
تکلیف کسی کو گر پہنچی، کیاا س میں تکلف سوچ ذرا
حیراں رکھا گر قاتل کو اے دیدۂ حیراں کچھ نہ کیا
جنبش سے تری مقتل ہوتا اک آن میں دشت کرب و بلا
عشاق کی بے باکی کا عوض اے ابرو براں کچھ نہ کیا
الٹا نہ عراق و شام و حلب دنیا نہ ہوئی ویراں تو کیا
جل تھل نہ لہو سے تونے بھرا خون مسلماں کچھ نہ کیا
اے ننگ جہاں اے شاد بتا کچھ آتی ہے تجھ کو شرم و حیا
اے جہل مرکب اے حیواں اے بے خبر انساں کچھ نہ کیا
٭٭٭