غزل
( برائے بہار اردو یوتھ فورم)
رنج و غم و الم میں بھی لب پر ہنسی رہی
زندہ دلی کے ساتھ مری زندگی رہی
تنقید و تبصرے ہوئے تنقیص بھی رہی
اپنی کتابِ زیست کھلی تھی کھلی رہی
آگے نہ بڑھ سکی وہ ترقی کی دوڑ میں
جس قوم میں جمود رہا بے حسی رہی
مہکا کئے گلاب شگوفے کھلا کئے
جب تک ہماری شاخِ محبت ہری رہی
تنہائیوں میں ہم کبھی تنہا نہیں رہے
ہر دم خیالِ یار کی محفل سجی رہی
ہم لعنت ِ ضمیر فروشی سے بھی بچے
شہرت بھی ہاتھ باندھ کے آگے کھڑی رہی
دل سے نہ دل ملا تو ملا کیا کوئی شفیق ؔ
ہر فاصلہ بنا رہا دوری بنی رہی
شفیق ؔ رائے پوری
موبائل نمبر 9406078694
***********************