غزل
 						 ٭……شاہد جمیل

پتّھر کے دریچے سے وہ چہرہ نہیں اُبھرا
پتھرا گئی جب آنکھ تو پھر کیا نہیں اُبھرا
شبنم نہیں جاگی ہے کہ شعلہ نہیں اُبھرا
اِک تیرے سوا درد میں کیا کیا نہیں اُبھرا
اِک تیرے تعلق میں اترنے کا صلہ تھا
چہرے پہ مرے کون سا چہرہ نہیں اُبھرا
پہلے تو نگاہوں کو ملی دعوتِ دیدار
پھر قصرِ تمنا سے دریچہ نہیں اُبھرا
سنتے ہیں کہ ہر ڈوبتی کشتی وہ بچائے
کہتے ہیں کہ موجوں سے کنارا نہیں اُبھرا
آنکھوں کے دئیے کب سے جلا رکھّے ہیں شاہدؔ
کھڑکی میں ابھی تک کوئی سایہ نہیں اُبھرا
******