Jab bhi chupkay say nikalnay ka iraada baandha...
mujh ko haalaat nay pehlay say ziyaada baandha...
 
chaltay phirtay isay bandish ka gumaa'n tak na rahay...
us nay insaan ko is darja kushaada baandha...
 
kitni bhi tez hui hirs o havas ki aandhi...
hum nay ik taar e tawakkul say labaada baandha...
 
yak ba yak jalwa e taaza nay qadam rok liye...
main nay jis aan palatnay ka iraada baandha...
 
tu nay samaan main jub baandh hi di thi manzil...
kis liye yaar meray paaon main jaada baandha...
 
saadagi husn ki sheron main baya'n karni thi...
lafz asaan chunay, misra e saada baandha...
 
SHAHZAD NAYYAR