کچھ ذرا دیر ٹھہر اے غمِ دوراں اب ہم
خاک ہوتی ہوئی ہستی کا نشاں ڈھونڈیں گے

راحتِ زیست بھلا کر ترے غم میں ناداں
دشت و صحرا میں محبت کی اماں ڈھونڈیں گے

پوچھ لیں اپنا پتا آئو کسی رہزن سے!
بے اماں شہر میں ہم اپنا مکاں ڈھونڈیں گے

شاید اِس بار چٹخ جائے یہ پتھر کا محل
کانچ ہوتی ہوئی ہم اپنی فغاں ڈھونڈیں گے

لہر پھر آئے گی بہہ جائیں گے خوابوں کے سراب
ہم فقط گزرے ہوئے نقشِ بتاں ڈھونڈیں گے

سوچتی ہوں کوئی آہٹ ہے ہوا ہے یا تم
نا اُمیدی سے امیدوں کے گماں ڈھونڈیں  گے

لے ہی ڈوبے گی یہ احساس کی بے کل آندھی
زندگی ہم تری ہستی کا دھواں ڈھونڈیں گے
*****