* Ek deewar jo hail hay meri sochon main *
"DEEWAR E GIRYA"
Ek deewar jo hail hay meri sochon main
Kitny paicheeda sawalon se mujhy rokti hay
Jab bhi main rkhat e safer bandhti hon shaany per
Apni jadou bhri hasti se mujhy tokti hay
Ye jo deewar k rehti hai siyah khanon main
Din dhaly apny tilsmaat ko dikhlati hay
Mujh ko mehsoor kiye rakhti hay angaroon main
Chaar janib rukh e anwaar se behlati hay
Esa lagta hay k taaron se damakti hui raat
Ek zara jumbish e mizgaa'n se bhi bujh jaye gi
Meri sochon k tasalsul ko ye baphri naagan
Ek hi aan main afsoos nigal jaye gi
Subh hoty hi ye dewar siyah khano'n main
Rait k dhair ki manind uter jaye gi
Raat ki jadou garri khwab si ban jaye gi
Shamma daano'n main faqt rakh hi reh jaye gi
Ik naya din meri weeran guzargaho'n per
Lay k kashkool meray sath uter aye ga
Mery daman se lipat ker ye samay ka raila
Mujh ko mujh se hi juda kerny pe uksaye ga
Ek deewar jo hayile hay meri sochon main ....
Shaista Mufti
|