* اِک قصۂ پارینہ دھندلا سا ہے آئینہ *
اِک قصۂ پارینہ دھندلا سا ہے آئینہ
گنجینۂ گوہر ہے یادوں سے بھرا سینہ
کیوں آنکھ چراتے ہیں ملتے ہیں جو محفل میں
اِک وقت میں اپنے تھے یہ ہمدمِ دیرینہ
بہتا ہوا پانی بھی تھم جائے گا جنبش سے
چھیڑو نہ کوئی نغمہ خاموش ہے سازینہ
اک ُکن کی صدائوں میں مدہوش غمِ ہستی
ہم رقص مہ و انجم چھلکے ہیں مے و مینا
آنکھوں میں لیے وحشت ساحل سے الجھتے ہیں
طوفانوں کی چاہت میں مرنا بھی ہے اب جینا
اِک قصۂ پارینہ ہے دھند کے رستے میں
تاحدِ نظر دیکھوں تخلیق کا آئینہ
******
|