Phir sun rahaa huuN guzre zamaane kii chaap ko
bhuulaa huaa thaa der se maiN apne aap ko

rahte haiN kuchh maluul se chehre paDos meN
itnaa na tez kiijiye Dholak kii thaap ko
[maluul=sad, despondent]

ashkoN kii ek nahar thii jo Khushk ho gayii
kyuuN kar miTaauuN dil se tere Gam kii chhaap ko

kitnaa hii be-kinaar samandar ho, phir bhii dost
rahtaa hai be-qaraar nadii ke milaap ko

pahle to merii yaad se aaii hayaa unheN
phir aaiine meN chuum liyaa apne aapko

taariif kyaa ho qaamat-e-dildaar kii Shakeb
tajsiim kar diyaa hai kisii ne alaap ko