Terii mahafil se uThakar ishq ke maaro.n pe kyaa guzarii,
muKhaalif ik jahaa.N thaa jaane bechaaro.n pe kyaa guzarii,

sahar ko ruKhsat-e-biimaar-e-furqat dekhane vaalo,
kisii ne ye bhii dekhaa raat bhar taaro.n pe kyaa guzarii,

sunaa hai zindagii viiraaniyo.n ne luuT lii milakar,
na jaane zindagii ke naaz_baradaaro.n pe kyaa guzarii,

ha.Nsii aa_ii to hai bekaif sii lekin Khudaa jaane,
mujhe masaruur paakar mere Gam_Khvaaro.n pe kyaa guzarii,

asiir-e-Gam to jaa.N dekar rihaa_ii paa gayaa lekin,
kisii ko kyaa Khabar zindaa.N kii divaaro.n pe kyaa guzrii.