غزل

فریبِ زیست کا اے دل ملال کیا کرتے
کہ یہ نصیب کا سب تھا کمال کیا کرتے
شمار کرتے رہے بے بسی میں ہم تارے
ستا رہا تھا کسی کا خیال کیا کرتے
جہاں پہ جنبشِ لب بھی گناہ جیسی ہو
وہاں پہ دوستو! ہم عرضِ حال کیا کرتے
اسی کے عشق کا اک آئینہ تھا دل اپنا
اسی نے توڑ دیا تو ملال کیا کرتے
کسے دکھاتے بھلا زخم اپنے سینے کا
کہ چارہ گر بھی تھا غم سے نڈھال کیا کرتے
جہاں شریک ہو اُس کی رضا شکیل ارماں
مخالفت کی وہاں ہم مجال کیا کرتے

شکیل ارمان

Lalpath, Post. Garaulia
24 Parganas (N)
Mob: 9038881938
بشکریہ ’’میر بھی ہم بھی‘‘	مرتب: مشتاق دربھنگوی
………………………