Ghazlon me aag pani hawa bhi rakho janab
Andaz har kisi se juda bhi rakho janab 
Dil me hain dushmani ke anasir  to kiya huaa 
Har shaks se salam wa duaa bhi rakho janab
Titli se unsiyat ka pata bhi to kuchh chale 
Kuchh rang chutkiyon me laga bhi rakho janab
Kiya jane phir kisi ko ye aalam nasib ho 
Apni tabiaton me  khata bhi rakho janab 
Niklo safar pe rakte safar baandh kar magar 
Hamrah apne maa'n ki dua bhi rakho janab
Kiya khoob mashwara diya mujh ko "Shamim" ne 
Balo pe tairne ki ada bhi rakho janab


Shamim Anjum Warsi 
M.D.Road , Garulia -743133
North 24 parganas(W.B)