Meri aNkhoN mein sitare sa chamakta hai koi
shab gaye der talak mujh mein sisakta hai koi

Doob jata hai teri aNkh meiN jab chaand mera
mere andar kahiN saye sa sirakta hai koi

aasmaN taroN ka maidaaN hai na hi chaand hai geNd
tifle-nadaan sa kyuN mujh mein humakta hai koi

kyuN tumheiN bheegna barish mein bhala lagta hai
meri baat aur hai mujh mein to dahakta hai koi

ladkhadati hai naqahat se ghareebi meri
mujh ko peekar mere nashshe mein bahakta hai koi

shahr curfew meiN hai, sunsaan gali, chup haiN shajar
kaaNp jata hooN jo patta bhi khadakta hai koi

sher likhta hoon mein qismat ki siyahi se 'sohail'
aaj bhi mujh mein hamawaqt damakta hai koi