* Shehr meiN tarke-janooN ke siwa chara bhi nahiN *
Shehr meiN tarke-janooN ke siwa chara bhi nahiN
dasht jane ka ab imkaan humara bhi nahiN
chaand sooraj ke liye jane machalle kyuN the
apni qismat meiN to TooTa hua tara bhi nahiN
kis ko aayega yaqeeN shoal-sifat hum the kabhi
yuN huye khaak bacha ek sharara bhi nahiN
faida koi nazar aata nahi jeene meiN
yani mar jane meiN ab koi khisaara bhi nahiN
hai bas ek qatrae-khooN se jo hai palkoN pe meri
warna khush rang to itna yeh nazara bhi nahiN
yeh alag baat bichadna tha baharhaal magar
jane wale ko kisi ne to pukara bhi nahi
kaisi majboori hai saaye ki tarah saath hai woh
saath apna tha kabhi jis ko gawara bhi nahi
aisi tanhai ki dil Doobne lagta hai 'sohail'
aur humko kisi tinke ka sahara bhi nahi
|