غزل

جو فیصلے کا ترے اعتراف کرلیتے
انا کو اپنی ہم اپنے خلاف کرلیتے
معاف ساری خطائیں ہماری ہوجاتیں
کرم کا اُن کے اگر اعتراف کرلیتے
ہر ایک مقام پہ یہ مصلحت پسندی کیوں
ضرورتوں کے تحت لام قاف کرلیتے
اگر معاف ہمیں تم نے کردیا ہوتا
تو اپنے آپ کو ہم بھی معاف کرلیتے
اگر یہ پردہ من و تو کا اٹھ گیا ہوتا
ہم اپنی ذات کا بیشک طواف کرلیتے
تمام ربط و تعلق وہیں فنا ہوتے
ہر اک حساب اگر صاف صاف کرلیتے
فراز ایسی فضا میں گھٹن سے بہتر ہے
ٹھکانہ اپنا سوئے کوہِ قاف کرلیتے

سبحان فراز

Q-667, Pakaria Talab, Akra Road
Kolkata-700024
Mob: 9339452614 / 9331660667
بشکریہ ’’میر بھی ہم بھی‘‘	مرتب: مشتاق دربھنگوی
………………………