|
* Khud ko paRhtaa huuN, chhoR detaa huuN *
Khud ko paRhtaa huuN, chhoR detaa huuN,
ek varq roz moR detaa huuN,
is qadar zaKhm haiN nigaahon meN,
roz ek aaiinaa toR detaa huuN,
maiN pujaarii baraste phuuloN ka,
chuu ke shaaKhoN ko chhoR detaa huuN,
kaasa-e-shab meN Khuun suuraj kaa,
qatraa qatraa nichoR detaa huuN
(kaasa-e-shab : begging bowl of the night)
kaaNpte hoNT bhiigtii palkeN,
baat adhuurii hii chhoR detaa huuN,
ret ke ghar banaa banaa ke “Faraz”,
jaane kyuuN Khud hii toR detaa huuN.
|
|