AB NA AKHLAQ,NA AADAAB NAZAR AATAY HAIN
JO HON INSAAN WOH KAMYAAB NAZAR AATAY HAIN
AAL-E-AADAM MAIN MUSALSAL HAI EZAAFAA LEKIN
KITNAY CHEHRAY HAIN JO SHAADAAB NAZAR AATAY HAIN?
BAH RAHAA AAJ HAI INSAAN KI AANKHON SE LAHOO
CHEHRAY AALOODA-E-KHOON NAAB NAZAR AATAY HAIN
KEYA KAHAA UN SE KISI NE?WOH HUWE HAIN GUM SUM
SOCH KE BAHR MAIN GHARQAAB NAZAR AATAY HAIN
SHAAYAD EHSAAS HUWAA UN KO JAFAA KAA APNEE
AAJ BAA DEEDA-E-PUR AAB NAZAR AATAY HAIN
MAHFIL-E-AISH-O-TARAB KHATM HU'EE RAAT KE SAATH
SAAZ AASOODA-E-MIZRAAB NAZAR AATAY HAIN
ROO-E-TAABAAN SE MUNAWWAR HAI MIRAA KHAANA-E-DIL
AAP TO GHAIRAT-E-MAHTAAB NAZAR AATAY HAIN
NEEND KEE WAADI DARAATI BHI,LUBHAATI BHI HAI
APNI MARZI SE KISAY KHWAAB NAZAR AATAY HAIN?
HAM TO HAIRAAN HAIN,KEYA HAM NE KHATAA KEE HAI PHOOL!
BADLE BADLE SE YEH AHBAAB NAZAR AATAY HAIN

With Thanks : Raushan Jahan