طارق متین

نام:محمدطارق متین ،ولدیت :۔ محمد متین الدین ۔تاریخ پیدائش :۱۰؍جولائی۱۹۶۸ء تعلیم: ایم اے (انگلش) وطن ۔لکھمنیاں بیگو سرائے۔پتہ : علم و ادب پبلی کیشنز ، حکیم شکور منزل، بھنور پوکھر ، پٹنہ۔۴۔ پیشہ۔ تجارت۔ تصانیف ۔۱۔ مشکِ سخن

گوشہ نشیں ہیں انجمن آرا نہیں ہیں ہم
لیکن یہ معجزہ ہے کہ تنہا نہیں ہیں ہم
جب سے ملی ہے دولت عرفاں و آگہی
دنیا میں رہ کے شاملِ دنیا نہیں ہیں ہم
مشکل نہیں ہے دوستو تسخیر کائنات
افسوس بس اسی کا ہے یکجا نہیں ہیں ہم
 فردا کا خواب وقت کی آواز ہیں جناب
 اک یاد گارِ عہدِ گذشتہ نہیں ہیں ہم
حاصل  ہے ہم کو لذتِ توبہ خطا کے بعد
 بہتر ہے آدمی ہیں فرشتہ نہیں ہیں ہم
شاداب ہے ہمیں سے ترا گلشنِ وجود
دریا ہیں جانِ آرزو و صحرا نہیں ہیں ہم
 طارقؔ متین یوں ملی توقیر خاک میں
 ہو کر بھی اس جہان میں گویا نہیں ہیں ہم
٭٭٭٭