* روح بخشی ہے کام تجھ لب کا *
غزل
٭……وَلی محمد ولیؔ
روح بخشی ہے کام تجھ لب کا
دمِ عیسیٰ ہے نام تجھ لب کا
حُسن کے خضر نے کیا لبریز
آبِ حیواں سوں جام تجھ لب کا
منطق و حکمت و معانی پر
مشتمل ہے کلام تجھ لب کا
رگِ یاقوت کے قلم سوں لکھیں
خط پرستاں پیام تجھ لب کا
سبزہ و برگ و لالہ رکھتے ہیں
شوق، دل میں دوام تجھ لب کا
غرق شکر ہوئے ہیں کام و زباں
جب لیا ہوں میں نام تجھ لب کا
ہے ولیؔ کی زباں کوں لذت بخش
ذکر ہر صبح و شام تجھ لب کا
|