* کیا مجھ کو عشق نے ظالم کوں آب آہستہ *
غزل
٭……وَلی محمد ولیؔ
کیا مجھ کو عشق نے ظالم کوں آب آہستہ آہستہ
کہ آتش گل کو کرتی ہے گلاب آہستہ آہستہ
وفاداری نے دلبر کی بجھایا آتشِ غم کو
کہ گرمی دفع کرتا ہے گلاب آہستہ آہستہ
عجب کچھ لطف رکھتا ہے شبِ خلوت میں گلروسوں
خطاب آہستہ آہستہ، جواب آہستہ آہستہ
مرے دل کو کیا بے خود تری انکھیاں نے آخر کیوں
کہ جیوں بے ہوش کرتی ہے شراب آہستہ آہستہ
ہوا تجھ عشق سوں اے آتشِ رودل مرا پانی!
کہ جیوں گلتا ہے آتش سوں، گلاب آہستہ آہستہ
او او نازسوں آتا ہے وہ روشن جبیں گھرسوں
کہ جیوں مشرق سے نکلے آفتاب آہستہ آہستہ
ولیؔ مجھ دل میں آتا ہے خیالِ یارِ بے پروا
کہ جیوں انکھیاں میں آتا ہے خواب آہستہ آہستہ
|