Apni hasti ki tashaffi ka ye saamaaN kar looN
Dard chun kar tera paiwast-e-rag-e-jaaN kar looN

Tairay zakhmoN ko smaiTooN maiN gulooN ki soorat
Apne daaman ko bahaaroN ka maiN unwaaN kar looN

MaiN kahiN hooN hi nahiN , Doob chuka hooN tujh maiN
Soch ko dukh se tere kaise guraizaaN kar looN

ChaaNd ne raat utarna hai mere aaNgan maiN
Shaam hote hi sitaaroN se charaaGhaaN kar looN

Ishq jazba nahiN yeh ishq aqeeda hai mera
Is aqeede ko maiN eemaaN maiN numaayaaN kar looN

Gulshan-e-ward se ik Khaar chubhaa hai un ko
WARD qurbaan karooN dard ka darmaaN kar looN