Dhup ke sath gya sath nibhane wala
Ab kahan aye ga wo laut ke ane wala
Rait par chor gya naqsh hazaron apne
Kisi pagal ki tarah naqsh mitane wala
Sabz shakhain kabhi aise tu nahi cheekhti hain
Kaun aya hai parindon ko darane wala
Ariz e sham ki surkhi ne kiya fash use
Parda e abr may tha aag lagane wala
Safar e shab ka taqaza hai mere sath raho
Dasht purhaul hai tufan hai ane wala
Mujh ko darparda sunata raha qissa apna
Agle waqton ki hikayat sunane wala
Shabnami ghas ghane phool larazti kirnain
Kaun aya hai khazanon ko lutane wala