محبّت کا اثر ہونے لگا ہے

برہنہ اک شجر ہونے لگا ہے



جُنوں زدگی کسی تو کام آیٔ

دلا ؛ غم معتبر ہونے لگا ہے

 

یہ دل ناشاد کم ہوتا تھا پہلے

مگر اب بیشتر ہونے لگا ہے

 

مِرے دامن میں شب کے آنسوؤں سے

سویرا تر بہ تر ہونے لگا ہے

 

یہ کس کی یاد کا چمکا ستارہ

اُجالا سر بہ سر ہونے لگا ہے

 

تری نظّارگی پہ حیف ہے تو

فقط صرفِ نظر ہونے لگا ہے

 

مجھے کیوں آج اپنے قد کا احساس

بھنور میں ڈوب کر ہونے لگا ہے

 

میں تیرا دوست کہلانے لگا ہوں

مرا دشمن نگر ہونے لگا ہے

 

مبارک ہو تجھے رفعت تری ؛ تو

مگر بے بال و پر ہونے لگا ہے
**************************