* سن لے جہاں کی داستاں ؛ خاموش رہ *
سن لے جہاں کی داستاں ؛ خاموش رہ
تو ہی نہیں یاں نکتہ داں ؛ خاموش رہ
گفتار کے بازار میں الفاظ کی
اب کچھ نہیں قیمت میاں ؛ خاموش رہ
محفل یہ ساری پارساؤں کی ہے یاں
حسن ادب مت کر بیاں ؛ خاموش رہ
سن لوں ذرا گویائی کا کرب نہاں
چپ رہ دلا ؛ نوک زباں خاموش رہ
روٹھی ہوئی یادوں سے باتیں بند کر
تنہائی دیتی ہے اذاں ؛ خاموش رہ
یہ بھی نہیں ہے سود مند اپنے ليۓ
اب چھوڑ دے فکر زیاں ؛ خاموش رہ
ملّا نےیوں ایمان کی تجدید کی
کھا ؛ پی ؛ چلا اپنی دکاں ؛ خاموش رہ
آئینے بول اٹّھیں گے میری داستاں
زحمت نہ کر اے رازداں ؛ خاموش رہ
**************************** |