حمد باری تعالیٰ

توُہی ابتداء توُہی انتہا تری شان جل جلالہٗ
میں فنا فنا توُ بقا بقا تری شان جل جلالہٗ
میں گناہگار ہوں اے خدا توُ معاف کردے مری خطا
تری رحمتیں ہیں ہزار ہا تری شان جل جلالہٗ
تو طبیب ہے مجھے کر عطا مرے دردِ دل کی ہراک دوا
ہے مریضِ غم تیرا لا دوا تری شان جل جلالہ
توُ قیام میں توُ رکوع میں توُ قعود میں توُ سجود میں
میں دعاء کرتا ہوں التجا تری شان جل جلالہٗ
توُ نفس نفس توُ نظر نظر توُہر ایک شئے میں ہے جلوہ گر
توُ نہیں ہے مجھ سے کبھی جدا تری شان جل جلالہ
توُہی صبح میں توُہی شام میں توُ فلک کے سارے نظام میں
ہے زمین پر ترا تذکرہ تری شان جل جلالہٗ
تو رگوں میں گردشِ خوں میں ہے توہی اضطراب و سکوں میں ہے
ہے ہر اک کے ساتھ یہ سلسلہ تری شان جل جلالہٗ
توُ شجر میں ہے توُ حجر میں ہے توُ ہی بحر میں توُ ہی بر میں ہے
تجھے علم سب ہے ذرا ذرا تری شان جل جلالہٗ
مرے دل کو ہے تری جستجو ترے نام سے مری گفتگو
ترا شکر کیسے کروں ادا تری شان جل جلالہٗ
مجھے صرف تجھ سے ہے واسطہ ترے نام سے مرا رابطہ
توُ عظیم ہے مرے کبریا تری شان جل جلالہٗ
مجھے یاسؔ میں بھی اب آس ہے تری یاد جب مرے پاس ہے
ہے زباں پہ میری خدا خدا تری شان جل جلالہ
٭٭٭