بے بسی
۔۔۔۔۔۔۔۔۔۔۔۔
یاور ماجد
۔۔۔۔۔۔۔۔۔۔۔۔۔
 
ہوا چلتی ہے
گرتے پات گہرے پانیوں میں 
ناؤ بن کر جب کہیں ہجرت پہ جاتے ہیں
شجر نوحے سناتے ہیں
 
ہوا دھیرے سے چلتی ہے 
ستارے ٹمٹماتے ہیں
کہیں سے چاند کا پرتو
کہیں سے روشنی کی لو
کبھی پانی پہ پڑتی ہے
تو گویا آسماں کی جھلملاتی بےبدل تصویر بنتی ہے
 
مگر جب بھی کوئی پتا ہوا میں اڑتے اڑتے 
پانیوں میں گر کے اپنی آخری ہجرت پہ جاتا ہے
تو سارے عکس بھی گویا فلک سے گر کے اک دم ٹوٹ جاتے ہیں
 
 
کنارے پر کھڑا جگنو اداسی سے 
خموشی سے 
یہ سب کچھ دیکھتا جاتا ہے
کر کچھ بھی نہیں سکتا
*************