GHazal
Yawar Maajed
 
din bhar ki shorishoN ke dabaao ke shor se
shab ke libaas-e-habs meN koyi shikan naheeN
 
kyooN raushni garoN ki zubaaneN haiN soKHta
kyooN lau kisi charaaGH ki bhi seena zan naheeN
 
andhe KHalaa ki khaayi meN girtaa hi jaaooN maiN
pairoN tale zameeN naheeN, sar par gagan naheeN
 
ik naGHma KHaamushi ka bani jaaye zindagi
ik raqs hai keh jis meN koyi chhan chhanan naheeN
 
Yawar hi ik hai aajiz-o-naa cheez-o- KHaaksaar
varna yahaaN pe kaun KHudaaye suKHan naheeN
**************