غزل

ڈوبتی ہے نبضِ دوراں ، کچھ کرو
شاعرو! دانشورو! دیدہ ورو!
گر نہیں مرہم ، نمک پاشی سہی
یہ تو کچھ مشکل نہیں؟ چارہ گرو!
کچھ نہ کچھ نادان مل ہی جائیں گے
روز ہی اک بت تراشو ، آذرو!
یہ سیاست کا لبادہ خوب ہے
بس یہی پہنے رہو ، فتنہ گرو!
تم سے کیا ہوگا زمانے کا بھلا
ظلمت و اوہام کے پیغمبرو!
یہ ہزیمت خوردگی اک ننگ ہے
کچھ تو دم دکھلائو ، میرے ہمسرو!
اس سے بہتر اور موقع ہوگا کیا
انور بیکس ہے تنہا ، خنجرو!

ظفر انور شکرپوری

Vill. Shakarpur, PO. Bharwara
Darbhanga-847104 (Bihar)
بشکریہ ’’میر بھی ہم بھی‘‘	مرتب: مشتاق دربھنگوی
………………………