|
* Gham kaa charcha to karo, zaKhm ko rusva to karo *
Gham kaa charcha to karo, zaKhm ko rusva to karo,
kya Khabar raah pe aa jaayeN, taqaaza to karo,
ab bhii us vaadi’-e-dushvaar kii jaanib haiN ravaaN,
log anboh dar anboh, tamaasha to karo,
ab bhii voh sarv-e-ravaaN raahat-e-jaaN hai sab kaa,
ab bhii kar sakte ho us ko chaman aara, to karo,
ek dar band hua hai to bujhe baiThhe ho,
raaste aur bhii haiN, chashm-e-junuuN vaa to karo,
phir vohii qaafila-e-rang-e-faraavaaN ik din,
kyuN na utregaa yahaaN? Khud pe bharosa to karo!
‘arsa-e-umr se chup chaap guzar jaana kya,
maut kii to nahiiN, ziist kii parvaa to karo.
|
|