|
* Qayaam hai abhii, suu-e-safar bhii aata huuN *
Qayaam hai abhii, suu-e-safar bhii aata huuN,
maiN is taraf se to ho luuN, udhar bhii aata huuN,
koii mujhe bhii vahaaN apne saath le jaaye,
maiN raaste pe is ummiid par bhii aata huuN,
tumhaari bazm meiN honaa hai jo suluuk, us kii,
mujhe Khabar bhii hai, aur, beKhabar bhii aata huuN,
kiya to hai mujhe gumraah bhii muhabbat ne,
maiN ghuum phir ke, magar, apne ghar bhii aata huuN,
kuChh apne zaahir-o-baatin ko aap bhii dekheN,
k maiN to jaisaa huuN, vaisaa nazar bhii aata huuN,
jahaaN jahaaN mire ‘aiboN kii aandhiyaaN haiN ‘Zafar’,
vahiiN maiN le ke chiraagh-e-hunar bhii aata huuN. |
|