* Woh khauf ka aalam thaa faza toot rahi thee *
Woh khauf ka aalam thaa faza toot rahi thee
Larzish thee labo'n par ke dua toot rahi thee
Saa'nso me'n koyee garmiye ehsas nahi'n thee
Mausam thaa saarabo'n ka hawa toot rahi thee
Har shakhs waha'n apne hi qadmo'n me'n parha thaa
Har aan hi deewar ana toot rahi thee
Peechhe ki taraf murh ke koyee dekhta bhi kyo'n
Har shakhs khule sar thaa balaa toot rahi thee
Maujo'n se ulajhta hua khawahish ka safeena
Halchal thee ke taqdees qoba toot rahi thee
Aaya tha nazar chand "Zafar" baam falak par
Ya zehan me'n yaado'n ki ghata toot rahi thee
170,Kheldar, Fatehpur-212601 (U.P)
|