ڈاکٹر ہاجرہ بانو کو مہاراشٹر اسٹیٹ اردوساہتیہ اکیڈمی ادبی ایوارڈ
اورنگ آباد۔معروف ادیبہ اور انشائیہ نگارڈاکٹر ہاجرہ بانو کو مہاراشٹر اسٹیٹ اردوساہتیہ اکیڈمی نے 2014کا ادبی ایوارڈ دینے کا اعلان کیاہے۔ڈاکٹر بانو
کو ان کی کتاب ’باغ ِ بہشت ‘ کیلئے منتخب کیاگیاہے۔یہ انعام 23مارچ کو ممبئی میں ریاست کے وزیر اعلیٰ کے ہاتھوں دیاجائے گا۔
آل انڈیا ریڈیواورنگ آباد سے وابستہ ڈاکٹر ہاجرہ بانو ایک تنقید نگار اور انشائیہ نگار کی حیثیت سے ملک گیر شہرت کی حامل ہیں۔ان کے تنقیدی مضامین اور انشایئے موقر رسائل وجرائد اور ویب پورٹل پر شائع ہوتے رہتے ہیں ۔ان کی تین کتابیں ’اردوانشائیہ اور بیسیویں صدی کے انشائیہ نگار‘، ’تنقیدی تلازمے ‘ اور ’باغ بہشت ‘ علمی وادبی حلقوں میں کافی مقبول ہوچکی ہیں۔
اس سے قبل ڈاکٹر ہاجرہ بانو کو ان کے علمی وادبی کاموں کے اعتراف میں اترپردیش اردواکادمی،لکھنؤ،اردوساہتیہ پریشد،احمدنگر،مہاراشٹر،اوصاف گروپ آف نیوز پیپرز لاتور، مہاراشٹر،ادارہ ادب اردو،اورنگ آباد اور اورنگ آباد میونسپل کارپوریشن بھی انعامات سے سرفراز کرچکے ہیں۔
ڈاکٹر بانو کو مذکورہ ایوارڈ ملنے پر متعدد علمی وادبی شخصیات نے اظہار مسرت کرتے ہوئے ان کو مبارک باد پیش کی ہے۔
|