|
مودی کو ہرانا ہے تو مسلک اور ذات برادری سے بلند ہو کر
مسلمانوں کو جے ڈی یو کا ساتھ دینا ہوگا— ذوقی
کامران غنی۔ چیف رپورٹر بصیرت آن لائن) ہم ایک ایسی گندی سیاسی دنیا میں ہیں جہاں سیکولر طاقتوں پر بھروسہ ہے نہ نام نہاد سیکولر کہے جانے والے لوگوں پر۔ جس طرح ام جے اکبر جیسے لوگ جو ایک زمانے میں گجرات کے قاتل مودی پر اداریے تحریر کیا کرتے تھے، اب بھگوا شال لیے اسی قاتل فکر کا حصہ بن رہے ہیں، اس نے میڈیا اور ایسے تمام لوگوں سے بھروسہ ختم کردیا ہے۔ یہی صابر علی جو دلی اسمبلی انتخاب میں بار بار گجرات اور مسلمانوں کے قتل عام پر مودی کو گالیاں دے رہے تھے، اب یہی مودی کو گلے لگانے کے لیے تیار بیٹھے ہیں۔ دراصل یہ دور خیالات کی موت کا دور ہے جہاں خود کو محفوظ رکھنا پہلے سے کہیں زیادہ مشکل ہوگیا ہے۔مذکورہ خیالات کا اظہار معروف ناول نگار مشرف عالم ذوقی نے کیا۔انھوں نے کہا کہ نتیش کمار کی سیاست نے اس وقت بھاجپا سے علیحدگی اختیار کی جب وہ یہ جانتے تھے کہ سیاست میں اس کا کیسا خمیازہ انہیں اٹھانا پڑسکتا ہے۔ لالو پرساد یادو کی سیاست اور مسلمانوں کو سبز باغ دکھانے کے نعرے کی پول کھل چکی ہے۔ اور لالو ایک ایسی پارٹی سے خود کو وابستہ رکھنے پر سیاسی طور پر مجبور ہیں، جس کا نگریس نے ہمیشہ مسلمانوں کا استحصال کیا ہے۔ بھاگلپور فساد سے لے کر بابری مسجد کا تالا کھولنے اور بابری مسجد کے شہید کیے جانے تک اگر کوئی ذمہ دار ہے تو وہ کانگریس ہے اور شاید اسی لیے کانگریس مسلمانوں کی پسماندگی اور زوال کو دیکھتے ہوئے بھی آج تک سچر کمیٹی کی سفارشات اور رنگناتھ مشرا کمیشن کو نافذ کرنے میں ایماندار نہیں ہوپائی۔ ان سیاسی پارٹیوں کے فرقہ پرست چہروں کو دیکھنے کے بعد بہار میں اکیلی امید جے ڈی یو نظر آتی ہے۔ اگر بہار کی ۴۰ اور یوپی کی ۸۰ سیٹوں پر مودی کے رتھ کو روک دیاگیا تو مودی جیسے فرقہ پرستوں کے وزیر اعظم بننے کا خواب کبھی شرمندہ تعبیر نہ ہوپائے گا۔ ’ہر ہر مودی ‘ کے نعروں میں، میں مستقبل میں مسلمانوں کے خوفناک مستقبل کی آہٹ پڑھ رہا ہوں۔ اور اگر بہار کے مسلمان اس وقت بھی سنجیدہ نہ ہوئے اور ان کا ووٹ محض مسلم امیدواروں کے چکر میں تقسیم ہوگیا تو پھر مودی کو آنے سے کوئی نہیں روک سکے گا۔ میں بہار کے مسلمانوں سے اپیل کرتا ہوں کہ فرقہ پرست طاقتوں کو روکنے کے لیے اس بار متحد ہوکر ذات پات مسلک سے بلند ہوکر جے ڈی یو اور نتیش کمار کے حق میں ووٹ کریں۔ میں ہمیشہ سے بہار کا
حصہ ہوں۔ ضرورت پڑی تو میں سرگرم سیاست کا حصہ بن کر فرقہ پرست طاقتوں کو روکنے کے لیے عملی میدان میں بھی آجائونگا۔
*********************
|
