Bus mujhe itna mehrbaan dedey
Mere ehsaas ko zubaaN dedey

Tere dil men bahut hai gunjaaiish
BemakaN hooN mujhe makaN dedey

Jo bhaTakne nah de hamen ab aur
Aisa ik meer-e karwaan dedey

Umr guzree hai Gham meN ai Maabood
Koyee KhushyoN ka bhi jahaan dedey

Barq ke hausley baRhaane haiN
Ai Khuda mujh ko aashiyaN dedey


Khaar hi khaar mujhko dey Ya Rub
Aur unhen sara gulsitaaN dedey

Mere KhushiyaN khushee se tou le le
Apne Gham mujhko jaan-e jaan dedey
Hausla usko kahte haiN shayad
BezubanoN ko jo zubaan dedey

Kitni tanha hai “Aarzoo” Khaliq
Usko bhi ek kaarwaaN dedey

"Aarzoo Mehek"