Maikadaa thaa chaa.Ndanii thii mai.n na thaa,
ik mujassam beKhudii thii mai.n na thaa ,
ishq jab dam torhtaa thaa tum na the,
maut jab sar dhun rahii thii mai.n na thaa ,
tuur par chherhaa thaa jis ne aap ko,
vo merii diivaangii thii mai.n na thaa ,
maikade ke morh par ruktii huii,
muddato.n kii tashnagii thii mai.n na thaa,
mai.n aur us Ghunchaa dahan kii aarzuu,
aarzuu kii sadgii thii mai.n na thaa ,
gesuuo.n ke saaye me.n aaraam-kash,
sar-barahnaa zindagii thii mai.n na thaa ,
dair-o-kaabaa me.n Adam hairat-farosh,
do jahaa.N kii bad-zanii thii mai.n na thaa.