Ghol kar gham sharaab lay aao,
Karb hai bayhisaab lay aao,
Aaj chairhoo.n ga gham kay taaro.n ko,
Koi zakhmi rubab lay aao,
Hum nashay mei.n sawaal poochei.n gay,
Hosh walo jawaab lay aao,
Hum bhi apnay gunah laye hai.n,
Tum bhi apnay sawaab lay aao,
Hum to sehra utha kay laye hai.n,
Raah mei.n tum saraab lay aao,
Ek samander hai apnay seenay mei.n,
Phir wohi mahtaab lay aao,
Kiyo.n sakoon mei.n rahay dil-e-muztir,
Ek naya iztaraab lay aao,
Qarz saaray utaar day ga Ebad,
Sab hisaab-o-kitaab lay aao.