Kaisi aankho.n ko hamari yeh saza daitay hai.n,
Khuwaab her rooz diye in mei.n jala daitay hai.n,

Itni umeedei.n na wabasta karo hergiz tum,
Chand jhonkay yeh diye pal mei.n bujha daitay hai.n,


Yaad rakhta hai yahaa.n kaun puraanay rishtay,
Gard par jaye to pehchan bhula daitay hai.n,

Khoon mei.n doob gaye phir koi hansti basti,
Roz khabro.n mei.n naye laashay dikha daitay hai.n,

Kitnay bay.his hai.n naye daur kay insaan ya Rab,
Shehar kay shehar yeh lamho.n mei.n jala daitay hai.n,

Hum he badlei.n gay zamanay ka yeh zalim, chehra,
Likh kay tum rakh lo kitaabo.n mei.n, bata daitay hai.n.