KHush-qada.n jab KHiram karte hai.n
fitna barpa tamam karte hai.n
mai-kasha.n ja ke mai-kade ke bich
sair-e-bait-ul-haram karte hai.n
tujh nigah ki sharab sath jigar
gazak aashiq mudam karte hai.n
murgh-e-dil ko dikha ke dana-e-KHal
dil-baran zulf-e-dam karte hai.n
jo hai.n tujh did ke gurasna-e-chashm
kab we zauq-e-taam karte hai.n
jo ki pite hai.n KHun-e-dil jun mai
chashm apne ku.n jam karte hai.n
kab milega wo jaan ab 'yakru'
dil pe gham izhdiham karte hai.n

****************