Us kii jaam-e-jam aa.Nkhe.n shiisha-e-badan meraa,
us kii band muTThii me.n saaraa baa.Nkpan meraa,

aao aaj ham dono.n apnaa apnaa ghar chun le.n,
tum tabaah-e-dil le lo Khittaa-e-badan meraa,

mai.n ne apne chehre pe sab hunar sajaaye the,
faash kar gayaa mujh ko saadaa pairahan meraa,

[faash = reveal; pairahan = dress]

dil bhii kho gayaa shaayad shahar ke suraabo.n me.n,
ab merii tarah se hai dard bevatan meraa,

[suraab = mirage]

ek dasht-e-Khaamoshii ab meraa muqaddar hai,
yaad be sadaa terii zaKhm be chaman meraa,

[dasht-e-Khaamoshii = silent wilderness]

roz apnii aa.Nkho.n ke Khvaab Khuun karataa huu.N,
haaye kin Ghaniimo.n se aa pa.Daa hai ran meraa,

[Ghaniim = enemy; ran = fight]

maghrabii havaa ne phir ye sandeshaa bhejaa hai,
muntazir tumhaaraa hai Khushbuo.n kaa ban meraa,