غزل
ڈاکٹر احمد ندیم رفیع
حیرتِ شوقِ تماشا ، رُخِ زیبا تیرا
دیکھ انگشت بہ دنداں ہے یہ شیداتیرا
ہمہ تن گوش ہے خود عالمِ بالا کا سکوت
غیرتِ حسنِ سماعت ، لبِ گویا تیرا
شبِ دیجور تری زلفِ سیہ کی تلچھٹ
مطلعِ صبح کو شرماۓ اجالا تیرا
نیلگوں جھیل ترے جادۂ منزل کا سراغ
عکسِ مہتاب فقط نقشِ کفِ پا تیرا
تجھ کودیکھوں کہ ترےعکس نما کودیکھوں
پسِ آئینہ مجسم ہے سراپا تیرا
محفلِ ساغر و مینا سے میں اٹھتا کیسے ؟
قلقلِ مے سے ہم آہنگ تھا ہنسنا تیرا
وسعتِ چشمِ غزالاں کی قسم ! دیکھ ادھر
میری آنکھوں میں ہے سمٹا ہوا صحرا تیرا
۸۸۸۸۸۸۸۸۸۸۸۸۸۸۸۸