* Mujh pe kaisa khumaar hai us ka *
G H A Z A L
~~~~~~~~
Mujh pe kaisa khumaar hai us ka
ChaaroN jaanib hisaar hai us ka
uR rhi hai jo roshni har soo
Dhoolhai ya Ghubaar hai us ka
RuKh pe har dam sajaaye rakhti hooN
Ye tabbasum qraar hai us ka
KiyuN na mairi ghazal haseeN Thehre
Maire harfoN maiN pyar hai us ka
Chain daita hai, le ke , bechaini
Bus yehi kaarobaar hai us ka
Rooh par jaise ziNdagi ka hai
Dil pe yooN ikhtiyaar hai us ka
Jaise aaNkhoN ko ho ujaale ka
YooN mujhe intizaar hai us ka
Log kuch bhi bhale kahaiN Aashi
Par mujhe aetibaar hai us ka
~~~~~~~~
Aisha Baig
~~~~~~~~
|