Vaqt-e-safar qariib hai bistar sameT luu.N,
Bikhraa hu_aa hayaat kaa daftar sameT luu.N,


phir jaane ham mile.n na mile.n ik zaraa ruko,
mai.n dil ke aa_iine me.n ye manzar sameT luu.N,

 

Ghairo.n ne jo suluuk kiye un kaa kyaa gilaa,
phe.nke hai.n dosto.n ne jo patthar sameT luu.N,


kal jaane kaise ho.nge kahaa.N ho.nge ghar ke log,
aa.Nkho.n me.n ek baar bharaa ghar sameT luu.N,

sail-e-nazar bhii Gham kii tamaazat se Khushk ho,
vo pyaas hai mile to samandar sameT luu.N,

[sail = flood; sail-e-nazar = tears; tamaazat = heat; Khushk = dry]

’Ajmal’ bha.Dak rahii hai zamaane me.n jitnii aag,
jii chaahataa hai siine ke andar sameT luu.N.